260 ədəd elektrik mühərrikli avtobuslar Azərbaycana gətiriləcək

Ötən il “BakuBus” MMC ümumi dəyəri 74 mln. ABŞ dolları olan 260 ədəd elektrik mühərrikli avtobusun Azərbaycana gətirilməsi üçün sifarişi verib.

Milli Məclisin bu gün keçirilən iclasında müzakirəyə çıxarılan “Azərbaycan Respublikası Nazirlər Kabinetinin 2025-ci ildə fəaliyyəti haqqında hesabatı”nda əksini tapıb.

Qeyd edilib ki, onlardan 60 ədədinin (9 metrlik) Naxçıvan Muxtar Respublikasında, 200 ədədinin (12 və 10,8 metrlik) isə Bakı şəhərində istismara verilməsi nəzərdə tutulur.

Ötən ilin sentyabr ayından etibarən SKD (Semi Knocked Down) üsulu ilə elektrik mühərrikli avtobusların yığılması, o cümlədən korpus və daxili hissələrin yığımı həyata keçirilir. 2025-ci il 24 sentyabr tarixində BYD Şirkətinin nümayəndələrinin Bakıya səfəri çərçivəsində Sumqayıt Sənaye Parkında yerləşən zavodda SKD üsulu ilə yığılan ilk elektrik mühərrikli avtobusun “BakuBus” MMC-yə təhvil verilməsi mərasimi baş tutmuşdur. 2027-ci ilin mart ayından etibarən CKD üsulu ilə avtobusların tam yığımı, o cümlədən qaynaq, boyama və son yığım prosesləri həyata keçiriləcəkdir. Bunun üçün 3 hektar ərazi ayrılmış, 2026-cı ildə tikinti işlərinə başlanılaraq qeyd edilən tarixədək yekunlaşdırılması nəzərdə tutulur.