Çinin "Geely" avtomobil istehsalçısı ABŞ bazarını hədəfləyir

Çinin "Geely" avtomobil istehsalçısı ABŞ bazarına daxil olmaq imkanını nəzərdən keçirir.

Bu barədə "The Wall Street Journal" (WSJ) qəzeti məlumat verib.

"Geely"nin qlobal kommunikasiyalar üzrə direktoru Aş Satkliffin sözlərinə görə, şirkət yaxın 2-3 ildə bunu elan edə bilər.

"ABŞ bazarına nə vaxt və harada daxil olacağımız bizim üçün hələ böyük sualdır", - deyə o, WSJ-ə müsahibəsində bildirib.

"Geely" elektromobillər, qoşulan hibridlər və daxili yanma mühərrikli avtomobillər istehsal edən geniş brend portfelinə sahibdir.

Digər Çin avtomobil istehsalçılarından fərqli olaraq, "Geely" İsveçdə nəzarəti altında olan "Volvo" şirkəti vasitəsilə artıq ABŞ bazarında mövcuddur. Bundan əlavə, "Waymo" ("Alphabet Inc."ə daxildir) özünün robot-taksi xidmətində "Geely" tərəfindən idarə olunan digər bir brenddən - "Zeekr" avtomobillərindən istifadə edir.

Satkliffin sözlərinə görə, "Geely"nin portfelindən olan "Zeekr" və "Lynk & Co." brendləri ABŞ bazarı üçün çox uyğun ola bilər.

O qeyd edib ki, şirkət hələ ABŞ-də istehsal yerinin axtarışı ilə məşğul olmayıb. Satkliff əlavə edib ki, mümkün variant kimi Cənubi Kaliforniyadakı "Volvo" avtomobillərinin yığılması müəssisəsi ola bilər.