İran ABŞ-nin Ər-Riyaddakı səfirliyini vurdu, missiya işini dayandırdı

ABŞ-nin Ər-Riyaddakı səfirliyi fəaliyyətini növbəti xəbərdarlığa qədər dayandırıb.

Bu barədə diplomatik missiyanın saytında məlumat verilib.

"Səudiyyə Ərəbistanındakı ABŞ nümayəndəliyi martın 3-də, çərşənbə axşamı günü bağlanacaq. Səfirliyə edilən hücum səbəbindən onun binasında qəbul müvəqqəti olaraq dayandırılıb", - məlumatda deyilir.

Səfirlik, həmçinin Səudiyyə Ərəbistanındakı bütün vətəndaşlarını təhlükəsiz sığınacaq tapmağa və sonrakı xəbərdarlığa qədər orada qalmağa çağırıb.

Xatırladaq ki, ötən gün ABŞ-nin Ər-Riyada yerləşən səfirliyinə dron hücumu edilib. Səudiyyə Ərəbistanının Müdafiə Nazirliyi faktı təsdiqləyib.

"Reuters"in məlumatına əsasən, bina boş olduğundan xəsarət alan olmayıb. Binadakı yanğın isə tez bir zamanda söndürülüb.

08:18

İran ABŞ-nin Ər-Riyaddakı səfirliyinə pilotsuz uçuş aparatları ilə hücum edib.

Bu barədə "CNN" məlumat yayıb.

Səudiyyə Ərəbistanı rəsmiləri də ABŞ-nin diplomatik missiyasına zərbə endirildiyi xəbərini təsdiqləyib.

ABŞ Prezidenti Donald Tramp da bəyanatla çıxış edib. O, ABŞ-nin Ər-Riyaddakı səfirliyinə hücuma və amerikalı hərbçilərin ölümünə cavab veriləcəyini deyib.

"Cavabın nə olacağını tezliklə biləcəksiniz", - deyə Ağ Ev rəhbəri bildirib.

Tramp, həmçinin ölkəsinin obyektlərinə və ərazilərinə növbəti hücum təhlükəsindən narahat olmadığını da qeyd edib.