KİV: ABŞ Administrasiyasının İrana mümkün hərbi təsirinin əsas elementləri açıqlanıb

ABŞ Administrasiyası təyyarələrin və uzaqmənzilli raketlərin istifadəsini İrana mümkün hərbi təsirin əsas elementi hesab edir.

Bu barədə CBS telekanalı mənbələrə istinadən məlumat yayıb.

Məlumatına görə, ABŞ Prezidenti Donald Trampa İrandakı vəziyyətə mümkün cavab variantları, o cümlədən "kiberməkan əməliyyatları, eləcə də komandanlıq strukturlarını, rabitə sistemlərini və dövlət mediasını pozmağa yönəlmiş psixoloji kampaniyalar" barədə məlumat verilib.

Kanalın mənbələri qeyd edib ki, bunlar ya təkbaşına, ya da "ənənəvi güclə birlikdə" istifadə edilə bilər.

CBS qeyd edir ki, hava qüvvələri və uzaqmənzilli raketlər istənilən potensial hərbi cavabın əsas elementləri olaraq qalır.

Mənbələrin iddiasına görə, Pentaqon rəsmiləri rəqəmsal məkanda "münaqişənin zərbələrdən kənara çıxdığı və davamlı əməliyyatları əhatə etdiyi" ssenariləri və psixoloji təzyiq kampaniyalarını nəzərdən keçirirlər.