KİV: Trampın Putinlə görüş planı Zelenski üçün sürpriz olub

Ağ Ev rəhbəri Donald Trampın Rusiya lideri Vladimir Putinlə telefon danışığı və Budapeştdə görüşmək barədə razılığa gəlməsinə dair açıqlaması Vaşinqtona səfər edən Ukrayna Prezidenti Volodimir Zelenski üçün sürpriz olub.

Bu barədə Amerikanın "Axios" portalı məlumat yayıb.

Məqalədə qeyd olunur ki, Vaşinqtona gələn Zelenski Trampla görüşə və ABŞ-ın Ukraynaya “Tomahawk” tipli qanadlı raketlər verməyə hazır olmasına dair ümidli idi.

Lakin “Merilend” ştatındakı “Endrüys” hərbi bazasına enişdən dərhal sonra Ukrayna nümayəndə heyəti Trampın “Vladimir Putinlə danışdığını və onunla Macarıstanda görüşməyə razılaşdığını” elan etməsindən təəccüblənib.

Mənbənin məlumatına görə, Zelenskinin Vaşinqtona səfəri çərçivəsində ABŞ-ın "Raytheon" və "Lockheed Martin" hərbi şirkətlərin rəhbərləri ilə də görüşü planlaşdırılır.

Qeyd edək ki, Tramp və Zelenski arasında danışıqların cümə günü Ağ Evdə baş tutacağı gözlənilir.