Kiyevdə şok: Sanatoriyaya daxil olub, əsgərləri girov götürdülər

Ukrayna Müdafiə Nazirliyinin Baş Kəşfiyyat İdarəsinin nümayəndələri Kiyevin cənubundakı Konça-Zaspadakı "Oktyabr" sanatoriyasında ukraynalı hərbçilərlə qarşıdurmaya giriblər.

Bu barədə "Ukraynskaya Pravda" qəzeti ölkənin təhlükəsizlik orqanlarındakı mənbələrə istinadən məlumat yayıb.

Mənbənin məlumatına görə, çərşənbə axşamı Baş Kəşfiyyat İdarəsinin nümayəndələri sanatoriyaya daxil olaraq oranı ələ keçiriblər, darvazaları sındırıb, hasarı dağıdıb, ətrafa odlu silahlardan atəş açıblar və 10 hərbçini əsir götürüblər.

Bildirilib ki, daha sonra kəşfiyyatçılar hərbçiləri azad ediblər və sanatoriyanın içərisində barrikada qurublar. Polis əməkdaşları, Ukrayna Hərbi Hüquq-Mühafizə Xidmətinin Baş Kəşfiyyat İdarəsinin nümayəndələri və Kiyev vilayətinin hərbi komendantı hadisə yerinə gəlib.

Qeyd edilir ki, Kəşfiyyat İdarəsi nümayəndələri hərbçilərin sanatoriyada qanunsuz yerləşdiyini və obyekti geri almaq istədiklərini bəyan ediblər.