NASA-dan tarixi qərar

Amerika Kosmik Agentliyi (NASA) astronavtlara orbital missiyalar zamanı ilk dəfə smartfonlardan istifadə etməyə icazə verəcək.

Bu barədə BFMTV nəşri məlumat yayıb.

Məqalədə qeyd olunur ki, NASA astronavtlarına ilk dəfə olaraq şəxsi smartfonları kosmosa aparmağa icazə veriləcək. Bu imkandan ilk yararlanacaq heyətlər gələn həftə Beynəlxalq Kosmik Stansiyaya göndərilməsi planlaşdırılan "Crew-12" missiyasının üzvləri, eləcə də 1960-cı illərdən sonra ilk dəfə Ay ətrafında uçuş edəcək Artemis II missiyasının heyəti olacaq.

NASA-nın administratoru Cared İsaakman bildirib ki, agentlik astronavtlara ailələri üçün dəyərli anları lentə almaq, həmçinin ilhamverici foto və videoları dünya ictimaiyyəti ilə paylaşmaq üçün lazımi alətləri təqdim edəcək.

Məqalədə vurğulanır ki, NASA indiyədək açıq təhlükəsizlik səbəblərinə görə bort elektronikasına son dərəcə ehtiyatla yanaşıb. Lakin indi agentlik smartfonların köməyi ilə kosmosdan daha şəxsi və eyni zamanda daha çox foto və video materialın əldə olunacağına ümid edir.