Pakistan Əfqanıstana "açıq müharibə" elan etdi

Gecə boyu Pakistan Əfqanıstanın böyük şəhərlərində Taliban hökumətinin hədəflərinə zərbələr endirib.

Pakistan müdafiə naziri hücumlardan danışıb və ölkəsinin münaqişəni "açıq müharibə" kimi qəbul etdiyini bildirib.

"Səbrimiz tükənib. İndi bizimlə sizin (Əfqanıstan-red.) arasında açıq müharibə gedir", - deyə Pakistanın müdafiə naziri Xavac Məhəmməd Asif bildirib.

Qeyd edək ki, Pakistan mənbələri həm hava, həm də quru zərbələrinin sərhəd boyunca Taliban mövqelərini, qərargahlarını və silah anbarlarını hədəf aldığını bildirib. Pakistan hökumətinin sözçüsü Müşərrəf Zeydi silahlı qüvvələrin Əfqanıstan hədəflərinə qarşı əks-hücumları davam etdirdiyini bildirib. X-dəki paylaşımda o, zərbələrin "Əfqanıstandan gələn səbəbsiz hücuma" cavab olduğunu bildirib. Zeydi 133 Taliban döyüşçüsünün öldürüldüyünü, 200-dən çoxunun yaralandığını bildirib. O, əlavə edib ki, Əfqanıstan tərəfində 27 mövqe məhv edilib və 9-u ələ keçirilib.

Taliban sözçüsü Zəbihullah Mücahid isə Pakistan qüvvələrinin Kabil, Qəndəhar və Paktiyada hava hücumları həyata keçirdiyini bildirib. Mücahidin sözlərinə görə, 55 Pakistan əsgəri öldürülüb, 19 mövqe ələ keçirilib. O, həmçinin Nangarhar əyalətində səkkiz Taliban döyüşçüsünün öldürüldüyünü və 11-nin yaralandığını bildirib. Həmçinin 13 mülki şəxs yaralanıb.

Qeyd edək ki, rəsmi İslamabad Kabulu Pakistanda hücumlar həyata keçirən Təhriki-Taliban Pakistan (TTP) yaraqlılarını gizlətməkdə ittiham edir. Taliban isə bu ittihamları rədd edərək, Pakistanın təhlükəsizliyinin onun öz daxili işi olduğunu bildirir. Taliban hökuməti yaraqlıların Əfqanıstan ərazisindən fəaliyyət göstərməsinə icazə verməyəcəyini bildirib və hücumlara "sərt cavab" veriləcəyi barədə xəbərdarlıq edib.