Pensiyaçı qadın fırıldaqçılara 20 qızıl külçə və 22 milyon rubla yaxın pul verib.

Moskvadan olan pensiyaçı qadın telefon fırıldaqçıları ilə ünsiyyətdən sonra onlara 20 qızıl külçə və müxtəlif valyutalarda 22 milyon rubla yaxın pul verib.

Bu barədə Moskva Şəhər Prokurorluğunun Mətbuat Xidməti məlumat yayıb.

Qurumun məlumatına görə, təqaüdçüyə zəng edən naməlum şəxs özünü xidmət şöbəsinin əməkdaşı kimi təqdim edərək, yaşadığı evdə domofonun dəyişdiriləcəyini bildirib. Cinayətkar bu bəhanə ilə onu guya yeni açarların alınması üçün SMS-lə daxil olan kodu söyləməyə inandırıb.

Bir müddət sonra qadına Rusiyanın Rabitə, İnformasiya Texnologiyaları və Kütləvi Rabitələrə Nəzarət Federal Xidmətinin (Roskomnadzor) saxta əməkdaşı zəng vurub. O, şəxsi məlumatlarının oğurlandığını, guya ondan və ərindən etibarnamələrin rəsmiləşdiyini, pulları saxlamaq üçün göstərişlərə əməl etməli olduğunu bildirib.

5 gün ərzində telefon fırıldaqçıları ilə, o cümlədən videobağlantı vasitəsilə ünsiyyətdə olan qadın şifrəli sözü deyərək müxtəlif kuryerlərə pul və hər birinin çəkisi 250 qram olan 20 qızıl külçə verib.

Yaşlı qadın 5 kq qızıldan əlavə dələduzlara 200 min dollar, 20 min avro və 4 milyon rubl da verib.