Yeni İnfo Xəbər Portalı

Dünən axşam saatlarında Qusarın Yuxarı Ləgər kəndində baş vermiş qəza zamanı dünyasını dəyişən şəxslərin Şair Ramaldanovun ailə üzvləri olduğu məlum olub.

Bu barədə hərbi ekspert Üzeyir Cəfərov sosial şəbəkə hesabında məlumat verib.

O bildirib ki, qəza nəticəsində dünyasını dəyişənlər Ramaldanov qardaşlarından biri olan polkovnik Elman Ramaldanovun ailə üzvləri olub.

Onlardan biri ailənin 36 yaşlı üzvü, polkovnikin qızı Tamilla Ramaldanova və ailənin yaxın üzvlərindən biri olan 43 yaşlı Cəmilə Bağırovadır.

Ailə üzvlərindən daha 4 nəfəri isə müxtəlif dərəcəli bədən xəsarətləri alıblar.

***

16:51

Fövqəladə Hallar Nazirliyinin “112” qaynar telefon xəttinə Qusar rayonu, Yuxarı Ləgər kəndində yol-nəqliyyat qəzasının baş verməsi və vətəndaşın avtomobildə köməksiz vəziyyətdə qalması barədə məlumat daxil olub.

Bu barədə FHN Mətbuat xidmətindən məlumat daxil olub.

Məlumatla əlaqədar dərhal əraziyə FHN-in Dövlət Yanğından Mühafizə Xidmətinin Qusar rayon Yanğından Mühafizə Hissəsinin yanğınsöndürən-xilasediciləri cəlb edilib.

Hadisə yerində əməliyyat şəraiti qiymətləndirilərkən “KİA” markalı minik avtomobilinin idarəetməni itirərək dərəyə aşdığı və vətəndaşın nəqliyyat vasitəsində köməksiz vəziyyətdə qaldığı müəyyən olunub.

Yanğınsöndürən-xilasedicilər tərəfindən avtomobildə köməksiz vəziyyətdə qalan 1 nəfər qadın xilas edilərək təcili tibbi yardım briqadasına təhvil verilib.

Hadisə nəticəsində ümumilikdə 2 nəfər həyatını itirib, 4 nəfər müxtəlif dərəcəli bədən xəsarətləri alıb.

Faktla əlaqədar müvafiq qurumlar tərəfindən təhqiqat aparılır.