Sudanda BMT obyektinə zərbə endirildi: Altı nəfər həlak oldu

Sudanın Kaduqli şəhərindəki BMT obyektinə Çevik Reaksiya Qüvvələri tərəfindən endirilən dron zərbəsi nəticəsində azı altı mülki şəxs həlak olub.

Bu barədə "Agence France-Presse" agentliyi məlumat yayıb.

Məlumata görə, şəhər Çevik Reaksiya Qüvvələri tərəfindən mühasirəyə alınıb. Mərkəzi Sudan hökuməti hücumu pisləyib.

Xatırladaq ki, Sudandakı vəziyyət 2023-cü ilin aprelində Sudan Şurasının sədri və ordu komandiri Əbdül Fəttah əl-Burhan ilə Çevik Reaksiya Qüvvələrinin rəhbəri Məhəmməd Həmdan Daqalo arasında fikir ayrılıqları səbəbindən gərginləşib.

Paytaxt Xartumda başlayan toqquşmalar tez bir zamanda ölkənin digər bölgələrinə də yayılıb. Ekspertlərin hesablamalarına görə, münaqişə nəticəsində ən azı 40 000 insan həlak olub, təxminən 14 milyon insan didərgin düşüb və bir çox insan aclıq həddinə çatıb.