Səudiyyə Ərəbistanı və Rusiya vizasız rejim haqqında saziş imzalayıb

Səudiyyə Ərəbistanı ilə Rusiya arasında vizasız rejimin təşkil edilməsinə dair razılıq əldə olunub.

Bu barədə Səudiyyə Ərəbistanı Xarici İşlər Nazirliyinin açıqlamasında deyilir.

“Səudiyyə Ərəbistanı Krallığı ilə Rusiya arasındakı əla münasibətlər çərçivəsində iki dost ölkənin vətəndaşlarının qarşılıqlı vizadan azad edilməsini nəzərdə tutan bir saziş imzalanıb. Saziş hər iki ölkə arasındakı inkişaf etmiş tərəfdaşlığın dərinliyini əks etdirir, humanitar ünsiyyətə daha geniş imkanlar açır və turizm, iqtisadiyyat və mədəniyyət sahələrində mübadilə imkanlarını dəstəkləyir.”, - açıqlamada deyilir.

Qeyd edək ki, hər iki ölkə vətəndaşlarına 90 gün müddətinə vizasız səfər imkanı verən saziş iş, təhsil, daimi yaşayış və ya həcc məqsədilə ölkəyə gələnlərə şamil olunmur. Bu məqsədlər üçün xüsusi viza alınmalıdır.