Uitkoff: Qəzza atəşkəs sazişinin birinci mərhələsinin icrasında irəliləyiş qeydə alınıb

ABŞ, Misir, Qətər və Türkiyə nümayəndələri Qəzzadakı atəşkəs sazişinin birinci mərhələsinin icrasında irəliləyişlər barədə məlumat veriblər.

Bu barədə ABŞ prezidenti Donald Trampın xüsusi nümayəndəsi Stiven Uitkoffun “X” hesabında paylaşdığı birgə bəyanatda deyilir.

Sənədə əsasən, ABŞ, Misir, Qətər və Türkiyə nümayəndələri cümə günü Florida ştatının Mayami şəhərində Qəzza atəşkəs sazişinin birinci mərhələsinin icrasını qiymətləndirmək və ikinci mərhələyə keçidə hazırlıq məqsədilə danışıqlar aparıblar.

"Birinci mərhələ humanitar yardımın artırılması, girovların cəsədlərinin geri qaytarılması, qüvvələrin qismən geri çəkilməsi və hərbi əməliyyatların azaldılması da daxil olmaqla irəliləyişlərə səbəb olub", - bəyanatda deyilir.