Yeni İnfo Xəbər Portalı

Vestasın 200 GVt-lıq mərhələsi və Azərbaycan üçün strateji imkanlar.

Yeni İnfo.az xəbər verirki, Qlobal enerji keçidinin əsas sütunlarından biri olan külək enerjisi son onillikdə sürətlə miqyaslanaraq enerji bazarlarında həlledici mövqeyə yüksəlib. Bu kontekstdə Danimarkanın aparıcı külək enerjisi texnologiyaları şirkəti Vestas Wind Systems qlobal miqyasda mühüm tarixi mərhələyə çataraq dünya üzrə quraşdırılmış külək gücünü 200 GVt-a yüksəldib. Bu nailiyyət 2025-ci ilin dekabr ayında Almaniyada ENOVA tərəfindən həyata keçirilən 65 MVt-lıq Meppen külək enerjisi layihəsində V172-7.2 MVt model turbinin quraşdırılması ilə rəsmiləşib.

Vestasın bu göstəriciyə çatması şirkətin həm quruda (onshore), həm də dənizdə (offshore) külək enerjisi texnologiyaları üzrə qlobal lider mövqeyini təsdiqləyir. Xüsusilə son yeddi il ərzində əlavə 100 GVt gücün quraşdırılması külək enerjisinin artan iqtisadi səmərəliliyini, layihələrin daha qısa müddətdə icra olunmasını və texnoloji innovasiyaların sürətini əks etdirir.

Bu inkişaf eyni zamanda külək enerjisinin artıq alternativ deyil, əsas enerji mənbələrindən birinə çevrildiyini göstərir.

Həmçinin qeyd edək ki, Vestas şirkəti hazırda 71 ölkədə fəaliyyət göstərir, 56.000-dən çox külək turbininə xidmət edir və 12.000-dən artıq ixtisaslaşmış texniki heyətlə çalışır.

Bu miqyas şirkətə dünyanın ən böyük külək turbinləri donanmasını bütün istismar dövrü ərzində yüksək etibarlılıq, təhlükəsizlik və performansla idarə etməyə imkan verir.

Vestasın qlobal uğurları fonunda Azərbaycanla əməkdaşlıq məsələləri də strateji əhəmiyyət kəsb edir. 

Azərbaycan Respublikasının Prezidenti İlham Əliyevin yanvarın 19-da Davosda “Vestas Wind Systems” şirkətinin marketinq, kommunikasiya, davamlılıq və ictimaiyyətlə əlaqələr üzrə qrupunun baş vitse-prezidenti Morten Dirholm ilə görüşü bu baxımdan diqqətəlayiq hadisədir.

Görüş zamanı Azərbaycanda bərpa olunan enerji, xüsusilə külək enerjisi sahəsində mövcud layihələr və gələcək imkanlar müzakirə olunmuş, əməkdaşlığın genişləndirilməsi üçün əlverişli şəraitin olduğu vurğulanmışdır. Azərbaycanın sabit investisiya mühiti, hüquqi çərçivəsi və yaşıl enerji strategiyası ölkəni beynəlxalq enerji şirkətləri üçün cəlbedici tərəfdaş kimi önə çıxarır.

Azərbaycanın bərpa olunan enerji potensialı, xüsusilə Xəzər dənizində offshore külək imkanları, Vestas kimi qlobal texnologiya liderləri üçün uzunmüddətli əməkdaşlıq perspektivləri yaradır. Bu əməkdaşlıq təkcə enerji istehsalı deyil, eyni zamanda texnologiya transferi, yerli kadr potensialının inkişafı və regional enerji təhlükəsizliyi baxımından mühüm strateji dəyər daşıyır.

Vestasın 200 GVt-lıq qlobal mərhələyə çatması külək enerjisinin dünya enerji balansında artan rolunu bir daha təsdiqləyir. Offshore külək layihələri yüksək ilkin kapital tələb etsə də, uzunmüddətli perspektivdə sabit və proqnozlaşdırıla bilən gəlir modeli yaradır. Xəzər dənizi hövzəsi isə hələ tam reallaşdırılmamış bazar kimi beynəlxalq investorlar üçün strateji maraq doğurur

Azərbaycan üçün isə bu proses qlobal enerji keçidində strateji tərəfdaşlıqlar qurmaq, bərpa olunan enerji portfelini genişləndirmək və regionda yaşıl enerji mərkəzinə çevrilmək baxımından əhəmiyyətli imkanlar yaradır.

Bakı Ali Neft Məktəbi. 

Texniki - istismar şöbəsinin rəisi Vaqif Zeynalov