Yeni İnfo Xəbər Portalı

"XX əsrin ən parlaq kometası olan Heyl-Bopp kometası Günəş sistemini tərk edə bilməyəcək və 4390-cı ildə yenidən Yer kürəsinə yaxınlaşacaq".

Bunu TASS agentliyinə Rusiya Elmlər Akademiyasının Kosmik Tədqiqatlar İnstitutunun aparıcı elmi işçisi Natan Eysmont deyib.

Onun sözlərinə görə, hazırda kometa kifayət qədər uzaqda - Pluton və Sedna cırtdan planetləri arasında yerləşir.

Eysmont vurğulayıb ki, yalnız kometa qayıtdıqdan sonra onun gələcəkdə Günəş sisteminin hüdudlarından kənara çıxa bilib-bilməyəcəyi aydınlaşacaq:

"Hər şey Yupiterin davranışından asılı olacaq. O, cazibə qüvvəsi ilə kometanı ya Günəş sisteminin hüdudlarından kənara atacaq, ya da birbaşa Günəşə göndərəcək və kometa orada yanacaq".

Qeyd edək ki, Heyl-Bopp kometası 1995-ci il iyulun 23-də kəşf edilib.