Yaddaş itkisi yalnız yaşla bağlı deyil: Alimlərdən mühüm kəşf

Alimlər yaşla bağlı beyində baş verən dəyişikliklərin yaddaş itkisi ilə əlaqəsini təhlil ediblər.

Bu barədə "Vice" nəşri məlumat yayıb.

Tədqiqatçıların fikrincə, yaddaş zəifliyi konkret beyin sahələrinin zədələnməsindən daha çox, beynin ümumi funksional pisləşməsi ilə əlaqədardır.

Müəlliflər bildirirlər ki, əgər aparılan araşdırmalar təsdiqlənərsə, bu yanaşma yaddaş problemlərinin müalicə üsullarının dəyişdirilməsinə səbəb ola bilər.

Araşdırma nəticələrinə əsasən, epizodik yaddaş - yəni keçmiş hadisələri xatırlamaq qabiliyyəti - yaş artdıqca həqiqətən zəifləyir. Lakin bu proses hər kəsdə eyni şəkildə baş vermir. Yeni tədqiqatlar göstərir ki, yaddaş itkisi yalnız yaş faktoru ilə izah olunmur.

Beynin yaddaşla əlaqəli əsas strukturlarından biri olan hipokampus bu prosesdə mühüm rol oynasa da, yaddaş itkisi yalnız bir sahənin zədələnməsi ilə məhdudlaşmır. Xüsusilə, 60 yaşdan sonra beyin həcminin orta göstəricidən daha sürətlə kiçildiyi insanlarda genişmiqyaslı beyin atrofiyası prosesləri müşahidə olunur.

Qeyd olunur ki, əgər tədqiqatın nəticələri elmi cəhətdən təsdiqlənərsə, yaddaş itkisi beynin lokal deyil, geniş yayılmış pozulması kimi qiymətləndiriləcək. Alimlər hesab edirlər ki, bu tapıntılar gələcəkdə yaddaş problemlərinin müalicəsi üçün real və yeni imkanlar yarada bilər.